八方噚日喺立法會突然發現一眾貌似「大媽」嘅女士，喺新民黨立法會議員葉劉淑儀陪同下，殺入平時用作訪問議員同官員的立法會大樓一樓咪兜參觀，其間有人更出手玩記者放喺咪兜嘅咪牌，有電視台攝記大佬見到，即時嬲爆，由立法會二樓大嗌落一樓，喝令呢班大媽收手，但佢哋仲係咁逐個排隊喺咪兜前，扮受訪者影相留念。立會秘書處同八方講，採訪位只供議員、官員同獲邀「出席委員會會議」嘅團體代表同公眾人士使用，其他人士不能使用。
講開大媽，旺角行人專用區最近因為一班大媽喺度唱歌跳舞而非常熱鬧，八方同事前日就喺《蘋果》即時新聞報道，原來佢哋多年來一直喺屯門公園賣唱搵食，有網民就話要光復屯門，約埋今個周六去屯門公園狂歡狂唱，仲講明會自備樂器招呼班大媽。