內地暴力救A股，結果一如所料，周一先高後低，周二再「跌多鑊」，較意外的是，估值相對合理的港股變了「提款機」，投資者不理價「掟貨」，先在周一「掟」妖股，周二再「掟」H股，同時繼續「掟」妖股，「掟」已成常態。
港股還會不會繼續被「掟」？這要視乎內地股市何時穩定下來。內地股市何時或如何穩定下來？這個問題，密西比當然回答不了，不過，有基金朋友指，要跌市終止的最佳方法是「由得佢跌」，觀乎情況，中央似乎亦開始接受現實。
朋友謂：「連內地散戶都識，過去幾日中央所謂嘅救市措施，只係令大家覺得中央無嘢做到。」他更坦言A股下半年走勢，很取決於今日股市能否「非人為咁企穩」。
他說：「噚日連新華社都公開話救市無效，可想而知，中央決策層直接承受要救市嘅壓力有幾大，但大家都知，救股市等同掟錢落海，所以若果今日個市穩定到，中央就唔使再亂出膠招，唔亂出膠招，下半年（股市）仲有機會可自然咁回復到，但若今日大跌，被迫再出膠招，神仙難變。」
突然想起，時任新界鄉議局主席的劉皇發年初二求得的中籤，「晨粧露彩髻邊雲，玉佩珠顏錦似銀。色則是空空是色，觀音曾勸世間人」，解曰：「不可貪心，自身平平，家宅平安，求財半遂」。車公又中。
密西比