特首梁振英為咗要創科局喺本立法會期過到，要求財委會一再加會。立法會就休會，唔少議員準備外遊，一眾準備「唞暑」嘅議員，有人表明「睬佢都儍」，會如期出發；亦有建制派焗住改機票。自由黨榮譽主席田北俊早已訂晒機票，今個周日會同屋企人去夏威夷玩，佢噚日就重申，唔會為咗政府要臨時加會就更改行程囉。
加會石禮謙焗留港
田嘅黨友，身兼財委會主席嘅張宇人噚日就話唔知幾多議員外遊，笑言：「除咗有一個哥哥（指田北俊）一早就唔喺度，仲叫我攞佢隻遊艇用吓。」張仲話，好在婉拒咗田少嘅好意，否則到時要開會，屋企人會幾失望。
其實經民聯石禮謙都訂咗今個月12號機票，先去荷蘭阿姆斯特丹，然後上船去蘇格蘭同愛爾蘭玩。家陣財委會加會打亂晒佢嘅計劃，惟有阿Q咁話：「冇乜所謂喇，我都唔介意留喺香港八卦吓。」