公關大姐大叫左丁山去陸羽二樓出席晚上飯局，陸羽去到慣啦，拿手小菜全部食過晒，如無特別，打道回府，早啲上床瞓覺算嘞，大姐大在電話大喝一聲：「汪阿姐係主人家呀，唔食都當見吓汪阿姐，聽吓八和會館逸聞。」啊，汪阿姐出場，咁又唔同，呢位無綫大姐大的確係藝壇常青樹，別人到此年紀，已經攞終身成就獎，得優閒處且優閒，但汪阿姐猶自奮鬥不休，日日學新招，天天排舊戲，似有用不完的精力。
汪阿姐在港島請客就是鍾意到陸羽二樓，樣樣都話好香好味好食。問佢最近會有甚麼大騷，阿姐講佢與羅家英二人組嘅福陞粵劇團成立於1988年，今年係27年紀念，當年膽粗粗以打不死精神學習粵劇，得羅家英指點教路，從此踏上粵劇舞台，是一生一大成就，但最大成就呢？就是從那一年那一天開始，嘜實咗羅家英，「賺咗個老公返嚟！」亦因為阿姐有魄力，敢作敢為，後來打破傳統，成為八和會館主席，講到呢筆，佢話好感激「黃飛鴻」關德興，「關公」人老有新頭腦，覺得女子做主席無所謂，粵劇圈總要搵接班人，大力支持阿姐上任。西九龍文化區曬太陽超過十年，至今一事無成，但最快會落成嘅，你估係乜？就係戲曲中心，讓粵劇界飲頭啖湯，汪阿姐講到呢度就要飲啖茶：「好多事係要大家出力，一齊去爭取㗎！」
講番粵劇，汪阿姐正在名師指點下，辛勤排戲，佢話劉老師係京劇大師李萬春門徒，事事一絲不苟，淨係穆桂英出場踢腿揚手揮旗一段（只有幾分鐘），已要翻來覆去排練幾十次，務求腰、腿、背、膊、手、手指皆同一時間有完美配合。如果晚晚演穆桂英，一搥鑼鼓演足六場，如此排練包冇蝕本，但係汪阿姐講：「六天演六劇，套套都逐個步驟排、背對白、背歌詞㗎！」我地行外人只係聽見都辛苦，背唱粵曲實乃一大苦事，邊度有咁好記性呀，何況還要有表情，動作，談情武打樣樣齊，做花旦確實不易。汪阿姐話福陞粵劇團會在八月九日晚演「萬世流芳張玉喬」，八月九日下午一時半演「宮主刁蠻駙馬驕」，八月八日晚演「曹操關羽貂蟬」，八月七日晚演「糟糠情」，八月六日晚演「英雄叛國」，八月五日晚演「穆桂英大破洪州」，名伶有羅家英、尤聲普、廖國森、陳嘉鳴、阮兆輝，在文化中心大劇院演出，票價由100至480，今時今日嚟講，便宜到極，與唔識唱歌嘅雞仔聲音樂會票價相比，幾戥粵劇唔抵。