A股暴跌，中證監主席肖鋼之前被股民狂插，話佢唔識股市，累人累物。佢之前做銀行家，從冇股市經驗，所以而家就被期指、孖展、配資搞到一鑊泡。肖鋼唔掂，據聞總理李克強上周六怒拍枱，大喝「我要暴力救市！」，親自上陣。從此被內地網民稱為「暴力哥」。
所謂暴力救市，就係夾硬來，首先唔准基金沽貨，跟住逼券商、保險公司去掃貨，粗暴無比。股市講真金白銀，暴力哥有幾多斤両，好快就知。滬指維穩得一日貨仔，深圳股市冇國家隊托市，就越跌越慘烈。
實踐證明，李克強對股市認識恐怕連散戶都不如。朱鎔基、溫家寶至少會知道股市有上有落，唔敢玩得太大。但習李班子一心要靠股市實現中國夢，李克強而家好似一個輸紅眼賭徒，越賭越大，恐怕會一鋪清袋！
黃尹華