年輕人妻Icy黃婉曼，呢幾年真係非常精彩，既做過天氣女郎，之後跳咗出嚟，成日扮靚靚喺媒體出現，做不同工作，早排更成為馬主馮柏基太太，遲啲佢又有個新嘅身份，大家未必估到，就係將成為最索嘅麵包師傅。
睇番馮柏基隻團體馬「點解」上月底勝出，基基有同另一成員梁芷珊到場拉頭馬，但就唔見Icy，原來Icy撇甩老公，跳去日本學師整麵包，將來或者開舖做老闆，亦可以整畀老公嘆，等基基食包包食到飽飽，夠晒情趣，諗起都開心。
不過Icy暫時未返港，基基喺香港冇得食包，但就可以食住餅先。佢個人名下隻「薑餅人」將喺周三快活谷煞科戰上陣，隻馬上季谷草兩勝，盡顯質素及上佳谷草性能，今季表現大倒退，主要係欠運，近八仗有七次排八檔或以外，唔輸就奇咯。不過今次忽然行好運，抽個一檔，形勢完全唔同晒。隻馬六歲仍好精壯，上季去到82分咁高都上名，家陣減到63分可以話大利，唔知Icy會唔會請日假，返香港拉頭馬呢？