喺香港，練馬師過去如果試過兩季成績唔達標，咁以後任何一季再不及格，就要被淘汰冇牌，李易達就正陷入「坐二忌三」困局，好彩今季早已贏夠最低要求嘅15Win，但未來仍挑戰重重。至於胡森，上季首次成績肥佬贏得12場，如果今季又衰，先得50歲嘅佢，喺65歲退休前就再冇quota，隨時食足15年驚風散，都咪話唔愁。
好多人今季初到季尾，都睇死胡森達標無望，但近日佢勝出「勁勇威龍」及「拼搏小子」後，家陣有12Win喺手，仍差三場形勢仍險峻，但又未致絕望。點解呢？
本周三快活谷煞科戰胡廐戰馬中，「勇敢福星」上仗跑第四明顯回勇，呢匹馬上季三班亦曾大勝，今次喺四班排二檔，當然係爭勝要角。仲有「高山威龍」，上仗亦走得接近有狀態，今次回師四捷嘅谷草1000米威力大得多，抽1檔更係好到不能再好。
到禮拜日（12日）沙田煞科戰，胡森嘅「索咖啡」、「精彩時機」亦有相當分量，所以計吓計吓，肥佬胡真係隨時戲劇性達標收場。