政壹花生友:泛民𥄫實黃成智動向 - 花生友

政壹花生友:
泛民𥄫實黃成智動向 - 花生友

「民主思路」召集人湯家驊經過政改一役,意興闌珊,退黨之餘仲辭埋以公民黨名義參選得到嘅新東議席,10月正式生效。呢個消息一出,大家都周圍問,除公民黨楊岳橋外,泛民仲有冇邊個會選?而唔少泛民都𥄫實,民主黨黃成智若然被踢出黨,就無拘無束啦,話唔定都會爭喎。

工聯會葉偉明失勢無緣

其實政圈早前都有消息話,黃成智有意喺新東參選;而佢仍然係民主黨成員,冇理由同公民黨爭,明顯係考慮出唔出選嘅關鍵。但有泛民中人話呀,民主黨本月16日就會開會處理係咪革除黃成智黨籍一事,據了解,黃成智被踢出黨嘅機會好大。而若然冇咗民主黨個招牌,可能更加輕鬆可以加入新東戰團,所以佢嘅動向好受泛民關注。
花生友聽聞工聯會都好想搵人出戰,但相信上屆喺新東敗選嘅葉偉明同呢場選舉無緣。有心水清嘅人同花生友講,同樣係上屆勞工界立法會議員嘅潘佩璆𠵱家冇得做議員,都仲係工聯會副會長,反觀葉做完議員後「裸退」咁滯,今屆領導層近廿個職位都冇佢份,可謂同人唔同命。
有指葉偉明當年跟工聯會前副會長梁富華出身,但梁剛剛喺換屆後退落嚟,葉亦因此失勢。有工聯會中人話,葉偉明係紅褲子出身,熟悉勞工法例,都戥佢唔抵。

花生友