九倉（004）有票真係唔要？講緊嘅係佢哋決定退出綠城（3900）董事局呢件事，日前綠城就宣佈，九倉兩位代表周安橋同徐耀祥，將會離開綠城董事會，但弔詭嘅係，公告暗示董事局入面有分歧，話兩人退出嘅背後原因，係九倉代表唔同意企業中交集團唔按比例咁派人入董事局喎。
話說九倉喺2012年用51億銀入股綠城購入三成半股權，仲做咗一段時間最大單一股東，但局勢自去年底生變，綠城董事長宋衛平等人竟將股份沽畀中交，令到佢同九倉並列大股東，而5月中交增持後，仲做埋最大股東，之後就派咗5位代表「佔據」董事局。持股約29%嘅中交有5名代表，但持股約24%嘅九倉就只得2位代表，又真係唔多公道嘅，難怪公告入面寫住唔同意中交「非按比例」嘞。
不過，九倉都好有風度，出咗將鬼馬聲明：話完成咗歷史任務，解釋當日入股拔刀相助綠城，原因只係因為宋衛平，仲強調絕無控制、全購綠城或其他野心。又一個港人同內地人合作失敗收場嘅案例。