萬人迷雷神莫雷拉，停賽期滿今期(8日)復出，佢之前季內四度刑滿復出之役，都贏兩WIN或以上，證明餓馬後鬥志特別旺盛，當中近兩次刑滿復出都有替蔡廐馬建功，今戰蔡廐三駒起用雷神，可望替禮拜五61歲生日之蔡約翰提早贏馬賀壽。
最值得捧場乃一對蔡廐王牌馬「皇子」及「花紅」，事關雷神近七匹蔡廐王牌馬座騎，交出四冠一亞兩季全上名。
第三場「花紅」近六仗一W三P，季尾大熟大勇，上賽初跑谷草千二米即開齋，姿態有餘未盡，翻查今季蔡廐T布自購新馬「鄉村輝煌」、「活力寶」、「有心人」及「澳斯卡」，開齋後再出均連捷，信馬房部署質新馬之急進手法，「花紅」有力繼續贏。
第四場「皇子」上仗如非影相不敵「人和家富」，已經可以取得季內兩捷，匆出唔轉路程，對手顯著減弱，趁勇可望靠放補中。