近來公司業績一落千丈。本性孤寒嘅老闆，決定重金禮聘，請個風水佬去公司行個圈。唔行由自可，一行我真係把鬼火，竟然要我呢位金融才俊，跟住老細走去招呼分分鐘呃你十年八年嘅風水佬？
眼前呢位師傅，絕對唔似蘇師傅咁不羈，亦唔係玲玲咁有肉地。一言以蔽之，就係似捉鬼天師林正英！啋！咁啱又係姓林。「師傅呀，我哋公司……」我話未說完，林師傅雙眼合實，吸一口氣。突然，佢睜開眼，「得！唔使講，你自己睇。」
果然，羅庚支針係咁發係咁發，發得勁過呢兩日港股！呼，後尾枕涼浸浸。「呢度有妖氣！仲係好惡嘅妖！」師傅，你係咪發神經，西遊記取西經呀，有妖氣，你唔好話我係孫悟空，集齊七粒龍珠就可以呼喚神牛，令港股A股起死回生！
「師傅！你要救吓我間公司！」老闆那個嚇到標尿嘅樣，作為擦鞋仔，唔通話「老細果然係腦細」咩，我梗係講，「係囉，救吓我哋呀！」
「放心，我做事從來都有計劃，一切都在我掌握中。」師傅瞄一瞄佢身邊那烚吓烚吓嘅徒弟仔，徒弟仔就行走咗。
老闆額角仲有幾滴汗，好奇問，「佢去邊呀？」「佢去廁所。」說時遲，那時快，我呆了！全公司同事都呆了，有女同事尖叫，原來徒弟仔竟然拎住支水喉，周圍亂淋水，淋到周圍到係。老闆額角除咗汗水，仲有啲水喉水，眼中好似仲有啲淚水，「師傅，你做咩嘢？」
林師傅氣定神閒，「放心，冇事，公司五行缺水，只要你公司水氣沖天，咩妖都奈你唔何，生意自然繼續步步高昇。」突然，我望一望地下，發現原本都叫清澈嘅水，開始變得污濁，我冇睇錯呀嘛？仲有黑色漂流物，「Oh！Shit！」係真係Shit。「放心，為加大力度，我要暴力啲，連屎渠都爆埋，咩水都放，確保水氣沖天。」真係唔慌唔屎氣沖天。
此時，公司電腦開始爆火光！大媽秘書喊住尖叫，「周圍都係屎，我要走呀！」鬼佬IT部同事大叫，「死啦！老闆啲機咁樣會死晒架！你快啲叫呢條友收手啦。」林師傅聽到呢兩句，彷彿怒髮衝冠，「邊個話走，邊個就要打靶！邊個話公司會死，邊個就係鬼！」佢指住IT同事：「係佢啦！佢有惡意，係妖孽！」
所有同事見到公司陷入一片混亂，唔走都唔正常啦。我望一望林師傅個羅庚仲係咁發，我問，「師傅，連妖孽同事都走，點解佢仲係咁發？」林師傅眼神話我知，佢覺得勢色唔對，「住口！杯水車薪呀，難救！𠵱家咪唔發囉！」What the……！佢用手撳實羅庚支針！天呀！
信錯一個奸人，你都尚且覺得自己只係技遜一籌，情有可原；但信錯一個癡線嘅，你會開始懷疑自己係低B，對自己嘅認同瞬間崩潰。正當我接受唔到自已之時，林師傅突開「金口」：「羅庚的針不能長按，廁所的水不能長放，惟今之計，要救公司，關門，自能大吉。」羅庚的針繼續發，越發越慢，直至冇電。
千頌C
http://fb.com/winbigwok
本欄隔周三刊登