下月底辭職退休的數碼通（315）總裁黎大鈞，似乎仲未搵啱接班人，科技總裁鄒金根（Stephen）會「做住先」，9月成為暫代總裁，為期一年或直至新總裁正式任命為止。
Stephen過去比較少同傳媒溝通，不過早於1999年已經開始擔任科技總裁，負責數碼通3G及4G網絡建設，過去十幾年一直同黎大鈞以及執董兼首席財務總裁陳啟龍拍住上，「三劍俠」齊齊幫數碼通打江山。
不過，黎大鈞又名「金句王」，寸人絕不手軟，曾經用「神戶牛柳」和「魚蛋粉」去比喻數碼通及3香港的3G手機，甚至指對家3G手機「應該攞去填海」，又試過帶傳媒測試對家網絡，批評對手網絡質素差等。唔知Stephen做咗暫代總裁之後，可唔可以延續講嘢字字珠磯的風格呢？