【汽車籽：貴駕光臨】
要數最具代表性的美國跑車，不得不提Ford GT40，它在1966至1969年4奪24 Hours of Le Mans冠軍，成功打倒連奪5屆冠軍的法拉利，為Ford寫下了輝煌一頁。如今，它竟現身香港，成為車主呂業惠（Wood）的藏品之一，實教萬千車迷葡萄不已。古董車飽歷風霜，保養方法亦與新車大有不同，除要加倍細心，還得掌握專業技術，值得大家深入了解。
眼前這台Ford GT40，雖非六十年代版本，而是八十年代的復刻版，可是全車外觀、內櫳及引擎等方面均是按照原版再次打造而成，同樣值得收藏。Wood表示，六年前在日本遇見它後，立即聯絡車主，對方起初不願割愛，苦苦糾纏了近五個月，才因日本經濟不景氣而忍痛出讓。
Wood如此努力說服對方，全因此車代表了美國跑車最光輝的時代，「我覺得佢嘅外形十分劃時代，當時喺Le Mans已經非常出名。時至今日，即使揸住佢出街，車身嘅線條同造型，都唔會俾𠵱家流行嘅跑車比下去。另外，佢嘅引擎同零件等都好有歷史，對後來嘅跑車發展有深遠影響。」
要找一台質素不俗的古董車已經很難，像這台狀態極佳的更是難上加難，怪不得Wood明知不能出牌，也甘願花費七位數字購入，作為收藏品。「呢部車喺市場上越嚟越少，有啲已經俾人拍賣，古董車嘅價值係不斷咁升。」
除了愛上這車的線條美，內櫳佈局也是一絕。「雖然係左軚車，但波棍係放喺左邊，呢個係佢嘅特色。」打開Ford GT40的蝴蝶形車門後，頓時展現出不一樣的美態，尤其錶板中間的長形設計及「啪」掣，已是現代跑車不會再出現的設計了。
雖然駕駛次數寥寥無幾，例如採訪當日適逢古董車展，Wood才能向政府申請出外，但壠動引擎的一剎那，銷魂聲響隨即讓他無限沉醉，「引擎聲簡直係我嘅至愛，係原始V8引擎聲，好似我哋鍾意玩車嘅人嘅心臟咁，亦唔需要改喉，聲音已經同Mustang或者GT500一樣。」
零件易保養 車身難打蠟
零件保養方面，Wood坦言沒想像中難，因為美國依然有很多車迷玩古董車，波箱及車軨全部能在美國購入，況且能與Mustang等車共用零件。至於外觀，Wood表示較少打理，因為車殼具有多年歷史，損毀程度各異，自己打理反而困難。
維修師傅黃泓熺指出，古董車的車蠟因年月而變得很薄，所以選蠟時要特別小心，「唔好用有磨砂嘅蠟，因為舊式嘅蠟或者市面上嘅粗蠟都有砂。尤其有啲古董車嘅蠟變得好薄，但程度唔一樣，例如經常俾太陽直曬嘅車邊便特別薄，唔小心控制打蠟機嘅熱力，車身嘅漆油有機會一整塊甩出嚟，所以為古董車打蠟好講經驗同耐性。」
即使簡單地以清水清潔車身也要留意，「唔好只用濕布抹一次就算，因為車身可能有沙石，用布一拖，就會刮花。最好用濕嘅海綿過水，再用乾布抹乾。」至於車櫳部份則較簡單，細微隙罅可用牙刷，而皮革污迹用洗皮水便可。
Steve McQueen都揸過 過千萬成交
荷李活已故影星Steve McQueen曾拍攝一套著名的賽車電影《Le Mans》，戲內他所駕駛的戰車正是Ford GT40。那台車的精采之處，除有Steve McQueen的腳毛，1967年更於比利時的Spa賽道中勝出，身價非凡。它在2012年的一個拍賣會上，成功以1,100萬美元成交。
記者：梁立勤
攝影：楊錦文、鄧鴻欣
編輯：陳國棟
美術：楊永昌