收拾政改敗局心情，政務司司長林鄭月娥噚日到訪兩個位於上環永利街同城皇街嘅「光房」，探訪合共4個單親家庭。
「光房」其實係社企「要有光」嘅計劃，旨在幫業主善用物業，幫有需要嘅單親家庭逐步自力更生，2012年9月起推出首間光房後，陸續有市民同機構主動聯絡「要有光」，至今提供逾30個住宅物業作光房，包括喺永利街由市建局提供嘅6個單位。光房會以低於市價嘅可負擔租金租畀單親家庭，至今惠及60幾個家庭嘅160名成員。大部份光房係兩房或三房單位，以合租形式租畀單親家庭共住，共享客廳同廚廁等。
林鄭鼓勵單親家庭成員後透露，政府計劃將約40個由地政總署收回現屬政府擁有嘅舊宿舍單位，交畀社企改造成「光屋」，希望更多家庭受惠。