旅客量跌，岳少話酒店業首當其衝最受影響，雖然入住率守得住80%，但房價平均已按年大跌一至兩成，據稱有中環五星級酒店仲由一晚4,000蚊暴減25%至3,000元。6月內地客除咗一般自由行跌10.6%，連內地團、深圳一簽多行及一周一行旅客都全線下跌；非內地客一樣少咗。
所以旅發局忙於搞宣傳，包括喺內地中央台晚間新聞後播放推介本港好客之道嘅宣傳片，希望減低早前反水貨客示威嘅影響，又推廣本地深度遊，例如將深水埗大南街新興嘅手作仔工作坊，包裝成類似北京798藝術區嘅文青景點。
旅發局亦積極開發海外新市場如印度，舊年已協助當地電視劇Sasural Simar Ka來港取景，今年會幫另一套印度劇嚟取景。