今年書展即將展出嘅填詞人手稿，揭示一代填詞人黃霑嘅名作《獅子山下》中，「不朽香江名句」原詞為「香港千秋萬歲」。原來當年霑叔對「香港千秋萬歲」念念不忘，其後喺1986年英女皇訪港青年精英大匯演嘅主題曲《這是我家》一曲重現。前廣播處處長張敏儀喺YouTube搵番呢段珍貴片段，首歌係顧嘉煇編曲，當日由葉詠詩指揮，1,600位青年人同張學友、張國榮合唱。
「地鐵飛奔到觀塘，纜車開上山上，大鐵管通過海床，東區快車湧去走廊」等歌詞，見證80年代香港起飛，由哥哥張國榮唱出「願這一曲歌罷，香港千秋百歲，永久變歡欣快樂場」嘅霑叔名句，場面令人感觸。張敏儀同八方講，當年大家高唱「Hong Kong，我愛Hong Kong」好真心，唔肉麻。有興趣可到此網址重溫 https://www.youtube.com/watch?v=wu3AXf_J2Mg&feature=youtu.be 。