【政壹花生友】
立法會就嚟收爐，唔少議員都好happy，準備遠離繁囂地飛去外國放暑假，政府官員又何嘗唔係鬆一口氣，個個買晒機票去度假。立法會真係有咁恐怖咩？有政務官（AO）聽到花生友呢個問號都覺得氣頂，話𠵱家立法會真係同以前唔同，基本上以前做得辛苦係有回報，𠵱家就只係為做而做。
懶理政策能否執行
梁振英上任特首後，官場怨氣衝天，事關佢講就天下無敵，懶理執唔執行到，令啲政務官好洩氣。有政務官同花生友講，其實梁振英早一兩年撞過板後已經算有少少改善，佢哋冇梁振英最初上場時咁辛苦，但近年大鑊嘅卻係立法會拉布，事關好多關於民生嘅嘢，佢哋事先做咗好多工夫，但最後上到立法會喺工務小組被糟質一輪，都未必獲通過，「就算可以直接上財委會再傾，都做到班同事好沮喪」。
當然呢樣嘢都同梁振英有關㗎，如果佢唔係同議員、尤其泛民開晒拖，人哋點會紮馬還擊？亦有人話梁振英始終都係罪魁禍首，好似創科局咁，明明佢嘅愛將楊偉雄都以特別顧問身份上任，泛民又講明堅持唔開綠燈，「我哋都唔明點解一定要再上立法會？𠵱家做好多嘢，都係為做而做，同以前真係好唔同」。花生友有問佢，如果換咗特首，會唔會好啲？「可能會㗎，冇咁好勇鬥狠，情況未必會係咁」。
花生友