一位老友賓架來電討論時事。話題當然不出建制派618甩轆事件及事後曝光嘅建制派群組短訊。中環人好難相信一班有錢商人、專業人士及在政壇打滾多年嘅民建聯工聯會政客會在重要關頭跣低，唔知「玩乜」嘅。正常人正常思維就係咁諗啦，因此推測是否阿爺幕後佈局，「黨的智慧和力量」無理由咁差嘅喎。
左丁山綜合各方面消息及細看短訊之後，始終認為建制派甩轆就係甩轆：與臨場應變無能有關，睇唔到任何跡象係阿爺故意如此事先安排；套用田北俊一句（曾鈺成亦附和），就係「人蠢無藥醫」，佢地係自己蝦碌嘅啫。老友賓架又問曾鈺成會否因此下台？左丁山覺得唔會囉，陳偉業提不信任動議係想玩吓曾主席啫，如果泛民議員居然支持動議，又係屬於人蠢無藥醫嗰類，曾鈺成雖然意欲在幕後為建制派出謀獻計，但觀其過往主持會議行為，佢其實吹雞好有尺度，並非黑哨，任何另外一位建制派議員代替曾鈺成做立法會主席，對泛民只會更差，更唔公正公道，公然吹黑哨都似。
老友賓架最後嘆息林行止（六月三十日）痛批林鄭月娥，覺得林先生有啲過份，對林鄭太harsh，佢與林鄭曾有交往，覺得林鄭係一個好人，忠心為香港做事，百分百付出嘅公僕，所以睇完林先生痛批林鄭，心有戚戚然，問左丁山有乜意見？
哎，老友還老友，左丁山急急搵番當日信報讀一讀林行止專欄，睇完覆電話俾老友賓架：「對唔住，我同情你，知你為何不快，但我同意林行止嘅觀點！」林鄭冇錯係忠心公僕，係好心人，但講真話，佢升到上政務司長就確係應驗林行止所言嘅Peter Principle。佢最啱做嘅位可能係民政事務局局長，而唔係發展局局長以至政務司司長，佢主管發展局時，香港土地供應開始緊張，提出保育中環街市、政府山西翼、景賢里、永利街，至今一事無成，變不死不活嘅手尾長項目，大搞反僭建，今天已是大笑話，且是間接幫助梁振英上台嘅主要助力（因唐英年住宅有僭建），林鄭重用張震遠亦證明佢嘅用人眼光有好大改善空間。至於林行止云：「據報林鄭司長曾請示高明，祈求擇好日表決方案……」苟如是，林鄭司長連搵人擇日都錯得離譜，打開金紫荊勳賢蔡伯勵老先生本通勝，一睇就知道617係月破日，618係歲破日，連續兩日都係諸事勿用，大事不宜，邊度駛請教高明吖！