民建聯噚日舉行23歲生日酒會，特首梁振英同港府官員、中聯辦主任張曉明當然係貴賓，建制泛民兩派元老到場唔出奇，但《蘋果日報》社長葉一堅同副社長張劍虹罕有獲邀，民建聯主席李慧琼Starry仲同堅哥握手交換卡片。
八方現場見到Starry拎住堅哥卡片，唔通佢兩個有深入交流？Starry唔好意思咁話實在太忙，只係同堅哥握過吓手、交換咗卡片，未有機會詳談，佢話想團結各界，所以冇特別諗唔想請啲咩人。堅哥則話覺得大家多啲交流係好事，等香港唔使咁撕裂。Starry首次擔大旗，難怪佢話有啲壓力，前晚突然作感冒，幾驚失聲，上台前專登飲番劑感冒茶。民建聯月底訪京，佢話會同領導人交換後政改同民生意見；CY致辭時勁送高帽俾民記，讚佢哋23年來「矢志不渝」地「真誠為香港」。