搞完政改，政制及內地事務局長譚志源話咁快就為自己訂好下一個目標：減肥。咪睇譚志源平時好似好瀟灑咁，原來佢有成199磅，喺處理政改呢20個月嚟，佢就重咗15磅咁多，因此佢下定決心，要同呢15磅肥肉講拜拜，總之2017，減磅一定要得﹗
佢仲設定比推動普選更進取嘅減肥時間表，就係半年內減走15磅，方法就係靠打高爾夫球。乜打高球都減到肥㗎咩？譚志源話喎，喺𠵱家咁熱嘅天時，唔坐高球車、只係喺高球場行路，咪減到肥囉，而只要行得夠耐，仲可以消埋脂㖭。見到譚志源咁有決心，八方亦相當期待半年後嘅譚志源，係咪可以輕輕鬆鬆扣上佢西裝褸嘅鈕。