第五批通脹掛鈎債券（iBond）好快公開發售，每年證券行都會借機會吸客，奇招百出，手續費「六免」、「十免」已經有啲out，有間叫寶盛嘅證券行，近排食正個潮流，新客登記兼認購iBond，就可以得到相等於100蚊嘅荔園代幣。
荔園啲遊戲貴得幾離譜，100蚊換到10個代幣其實都唔係好見使，夠玩一次鬼屋，或碰碰車加恐龍尾瀡滑梯一次咁多。除非本身打算去荔園玩一轉，否則因為買iBond送代幣而特登去荔園一次，分分鐘iBond賺嘅利息都唔夠玩！
講起吸引人開戶兼認購iBond嘅花招，上年真係多不勝數，不過最有創意嘅都係時富金融（510），上年會回贈交通費200蚊。如果鍾意毒在家中，時富仲會上門親自畀張開戶form你填！