幾時都話網絡世界嘅嘢，係千變萬化，尤其係喜好方面，真係難貼過中六合彩。好似喺2001年，因為參加婦女節目嘅鬥唱環節，唱咗一首《娃娃愛天下》而俾評判江華狠批嘅黃宏舜（娃娃舜），雖然佢歌不精、舞不勁，舞姿騎呢，真係好難令人動心，點知就係有人愛佢嘅獨特台風兼五音不全嘅唱功，令佢喺節目演出嘅「精采」片段喺網上瘋傳，呢條笑爆嘴嘅短片，冇受時間影響，09年有網民再喺YouTube上載，一個禮拜嘅瀏覽次數突破30萬，你都咪話唔厲害！
網友開「阿舜屋」專頁
唔知係咪因為江華俾人野生捕獲佢復出做保險嘅關係，搞到有人喺網上尋舜，結果皇天不負有心人，噚日有網民喺網上搵番娃娃舜，佢仲同一個南亞裔女人結咗婚，生咗小朋友，仲話佢多數喺元朗錦田、屯門、將軍澳等出沒，亦有網民話佢喺觀塘揸小巴，冇耐呢個阿舜亦都有留言話：「估唔到隔咗咁多年，仲有咁多人睇，認真畀面多謝支持！」之後仲有網友幫佢開咗一個叫「阿舜屋」嘅專頁。噚日馮仁昭都有問過江華， 問佢會唔會去搵娃娃舜買保險，江華就話：「我唔會主動搵佢買！但如果佢有需要，我一定賣畀佢！」
撰文：馮仁昭
