7.1遊行人數大減，有政界中人認為反映政改已經唔係市民最關心嘅事，嚟緊呢段時間可以休養生息。花生友聽聞有政界中人趁暑假去旅行之際，更多政界中人卻話暑假走唔開，事關年底區選在即，建制泛民都唔可以甩轆，呢次選舉更或影響建制派喺新東補選嘅出戰人選。
湯家驊辭職，公民黨如無意外派出湯大狀愛徒、現任新東支部主席楊岳橋出選，觀乎其他泛民無意出戰，似乎楊岳橋代泛民上陣都無乜懸念。反而建制派嘅部署，卻十畫未有一撇。查實，邊個建制派第二梯隊唔想透過補選谷吓知名度？其實從過往兩陣營選舉得票可見，泛民候選人若然喺新東協調只派一人落場，幾乎篤定sure win；建制派若然要落場，相信係要練兵多過要一席，各界抬轎助谷知名度，試問邊個新星唔想？
工聯會未必讓路
建制陣營流傳民建聯有意搵反佔中大旗手陳勇出征，事關佢都係下屆立會超級區選嘅民建聯潛在候選人，試吓腳又何妨？花生友聽聞最反對陳勇出戰嘅可能係工聯會，內部仲有意見醞釀，如果陳勇出，佢哋應該派吳秋北喺內部爭出線權，話吳秋北都有搞反佔中，咪睇吓西環要邊個囉。
點解工聯會未必讓路？撇除新仇舊恨，皆因呢場或於明年初舉行嘅補選，同時都係宣傳緊明年底立法會選舉啦，如果某黨候選人被力谷，年底再選時，呢位候選人一定有優勢，有人話輸咗仲好，會有同情分加㖭，換言之年底出選勝算更多，又難怪同係阿爺親生仔，喺呢啲時候都要拗手瓜。至於邊個跑出，據聞要睇區選戰績，邊個黨有令人眼前一亮戰績，邊個牙力就高啲囉。
花生友