舊年尹佩斯（RVP）仲話喺曼聯好開心，想續多份長約，踢到掛靴；點知今年見到自己個正選位危危乎之後，就想轉軚離隊，同拿尼、普多斯基一齊飛去土耳其掘金。英國《衞報》披露，尹佩斯已經同土超嘅費倫巴治大致傾好合約，維持佢喺曼聯嘅待遇，簽約四年，但尹佩斯唔心足，仲想向曼聯鑿多筆，要1,200萬鎊（約1.4億港元）嘅分手費！
投費倫巴治周薪25萬鎊
誠信同利益邊樣緊要啲？相信球迷都好清楚尹佩斯嘅選擇。舊年三月，我求大俠先寫過尹佩斯係「尚書大人」，啲風吹向邊就擺去邊，嗰陣佢話：「我喺曼聯好開心，希望有更長合約，甚至永遠效力曼聯至退休。」一年過去，曼聯領隊變咗做佢嘅荷蘭同鄉雲高爾，但尹佩斯卻失去必然正選，因為雲帥傾向搵朗尼踢單箭頭多啲。尹佩斯見唔對路，就想走人；𠵱家尹佩斯已經31歲，袋緊25萬鎊周薪，同曼聯淨番一年合約，再續約的話唔單止正選位難保，人工都一定要減，所以佢搵定後路，同土超嘅費倫巴治傾掂數。
細哨勢投土超新貴
費倫巴治願意開出四年合約，養到尹佩斯35歲，周薪就繼續25萬鎊。呢個待遇已經好好啦，但佢仲唔滿足。《每日鏡報》爆料，尹佩斯要求曼聯畀埋合約最後一年嘅人工佢，大嗱嗱1,200萬鎊。換句話講，尹佩斯下季喺費倫巴治咪出足一年雙糧！不過，《每日郵報》話尹佩斯嘅轉會仲有變數，呢個星期曼聯開操，佢會返去同雲高爾傾吓，如果雲帥承諾佢一定有正選，話唔定為咗冠軍留隊。如果尹佩斯真係走人，費倫巴治願意畀曼聯約500萬鎊轉會費。
土超今夏成為過氣球星掘金嘅熱點，例如另一名曼聯球員拿尼應該九成九過檔費倫巴治。雖然士砵亭等葡超球隊都想要拿尼，但講錢，始終唔夠土超鬥，費倫巴治早前都發聲明，話拿尼噚日會嚟土耳其體測同傾埋啲細節。
另外，喺阿仙奴被投閒置散嘅普多斯基亦落實加盟加拉塔沙雷，下季同史奈達拍住上。至於喀麥隆中場麥比亞幫西維爾連拎兩屆歐霸盃冠軍之後，今夏都以自由身嚟到土超，效力特拉布宗。除咗呢啲大家聽慣聽熟嘅勁旅，升班馬安塔萊亞都大展拳腳，已經簽入喀麥隆「獵豹」伊度奧，同埋好大機會簽入前世界足球先生朗拿甸奴。「細哨」日前喺網上話，佢遲啲會喺土耳其同大家見面。
識睇，一定係睇足英台【英波Live】：
http://soccer.appledaily.com
http://bit.ly/engballlive