電盈的香港電視娛樂（nowTV）獲批出12年免費電視牌照，一眾nowTV藝人原本滿心歡喜準備迎接開台日，早前齊齊整整以夏日summer look舉行下水禮，拿水槍互射玩得盡興。不過，自從何麗全離職後，盛傳新高層上場要大肆改革，投放更多資源落免費台，有意將now收費的102觀星台於9月底關閉，梁思浩和梁榮忠的王牌節目可能無聲無息被cut走。
藝員部更成重災區，據悉十幾位合約藝人約滿後將陸續冇得留低，過往他們的主要工作是幫收費台做主播、旅遊、資訊等節目，雖然人工低好抵用，但高層再計算成本下想慳得就慳，寧願全部轉散工，無需每月支薪，又可以請無綫、港視和亞視的離巢藝人，增加新鮮感。
身在外地拍旅遊特輯的黃心美直言有所聞，她說﹕「都擔心，話摺話摺都未摺埋，要返嚟了解吓先。」她表示自己是最穩陣一個，她解釋：「我係全公司唯一一個員工藝人，合約至明年9月先完，有bonus、醫療，同其他人唔一樣。」據悉90後的林志超（Andy）上月底約滿後已不獲續約，昨日他在電話說﹕「係冇簽經理人合約，自己manage自己，冇固定底薪，但自由度大啲囉，未簽之前我都係part-time。」
「8月會開大會」
另外，鄧洢玲（阿旦）和夏雨兒子黃奕晨前日與一班nowTV藝人在迪士尼參與《觀星總部》1000集錄影，阿旦自言有為將來打算，她說：「我仲有一年約，唔太擔心，因為自己外面都有做啲網購生意。」黃奕晨則說：「我年底約滿，但仲有一年生約，公司未同我哋講任何嘢，聽講8月會開大會，好似會有啲嘢搞，唔擔心咁多。」下月中約滿的蔡誌恩則說：「好似有聽過，之後會用其他形式合約，自己有信仰相信有安排。」而他日前在fb灰爆留言﹕「如果有一天我失業，改行去賣魚蛋，有人會請我這『老嫩肉』嗎？」
採訪：嵐山
攝影：沈健程