A股暴跌，有內地網民建議一條絕世好橋救市：由中紀委頒佈特赦令，所有官員只要現時肯撈貨，就當係愛國義舉，買貨金額可以在將來被查賄款中扣減，換來刑期優惠！呢招獲唔少股民贊同，有人話，惟有等中紀委出手，先能真正救到市。
上個禮拜，中證監主席肖鋼的動向成為內地股市焦點。喺上個禮拜二，網傳肖鋼可能離任，A股早上大幅反彈，但下午有媒體指為謠言，市況隨即下插。有市場人士話，肖鋼可能自知前景不妙，近期救市雜亂無章，搞到總理李克強上個禮拜六要拍枱，話要「暴力救市」。中證監發行監管部處長李志玲兩個禮拜前落馬，內地報道是中紀委出手，之後勢必有更高層出事，中證監肯定人心惶惶。中紀委早啲搞掂單案，可以消除不明朗因素，大市就會真正大反彈。
黃尹華