今日沙田日馬跑11場，全日非巫即摩咁滯，騎師巫斯義跑到第七場已中三元，而練馬師大摩更勁，跑完第八場更加四喜臨門。
第八場三班泥地一哩，摩廐雙龍出海，結果換郭能之「兵工闖」排番內檔寧舍唔同，早段守好位，直路抽中間位置殺上，順利一攻而破越贏越遠，彈甩「歡樂小子」逾兩身位，爆出7.4倍半冷win，大摩連同之前所贏之「人民武士」、「勇士勁」及「田黃」在內，一日四捷取得季尾代表作，佢一下子彈上67win，而蔡約翰全日只贏「安荃」，埋單大摩以67比61win，領先蔡約翰6場，奪冠形勢極度樂觀。
「兵工闖」今季大爆發，呢場飛起韋達用郭能即贏，季內累積五捷，仲幫埋周一(6日)牛一之郭能提早慶生。
今場韋達新接手胡廐「威勢之寶」，閘前畀落飛黨重插，不過跑落同廐侶「至勝威龍」一樣毫無威勢，雙雙三甲不入，二至四名順序是「歡樂小子」、「黃金宅男」及「方程式」，四重彩派十六萬二千幾。