今個夏天NBA最搶手嘅自由身球員阿域治（LaMarcus Aldridge），上周六宣佈咗下一站落腳地啦！幾日嚟同多支球隊高層食飯傾偈後，阿域治最終都係決定返老家德州，加盟馬刺爭冠軍指環。
可以拍住偶像鄧肯（Tim Duncan）組成最強「雙塔」，固然係阿域治想去馬刺嘅一大誘因；但令29歲嘅佢決定推咗太陽而加盟馬刺嘅關鍵，係上周五同教練普波域治（Gregg Popovich）嘅第二次會談。盛傳普帥喺個午餐會上保證，嚟緊四季都會繼續教馬刺，所以阿域治就放心投誠，將會簽四年總值超過8,000萬美元（約6.2億港元）人工嘅合約，據講最後一年係球員選項。
湖人又撲空改斟希拔
主將陸續簽約留效，清走部份板凳之後簽埋個強援，馬刺𠵱家同總冠軍嘅距離，基本上只係差一位「第六人」──上季結束後，真路比利（Manu Ginobili）一直對幾時退休有啲猶豫；不過，大自己年幾嘅戰友鄧肯都繼續打，已經效忠馬刺13季嘅Manu，都好大機會願意為球隊再賣命一季嘅。佢阿哥Leandro就喺twitter話，睇馬刺𠵱家嘅正選陣，加多個第六人就啱啱好，而呢位第六人最好就係拉丁人──仲唔係暗指嚟自阿根廷嘅Manu？
相反，爭取唔到「LA to LA」嘅湖人，今夏嘅第一簽竟然係溜馬中鋒希拔（Roy Hibbert）。據報湖人目前同溜馬商討緊交易細節，準備用選秀權嚟換呢位來季人工高達1,550萬美元（約1.2億港元）嘅兩屆明星賽球員。
