現年30歲的內地女歌手張靚穎一直都好少公開講佢嘅感情事，點知前晚佢喺長沙舉行演唱會，突然叫佢經理人公司CEO男友馮柯上台同佢求婚。咁主動公佈戀情，一啲都唔似張靚穎嘅風格，聽講話係佢見男友一路猶豫不決，所以就自己出手。
台上激咀
張靚穎唱完《終於等到你》之後，突然話從18歲起有一個人一直陪住佢：「12年了，我不想一個人過了，你要娶我就上台！」於是馮柯就喺全場觀眾尖叫聲之下衝上台，最後仲攬住張靚穎咀嘴。張靚穎自己都忍唔住，眼濕濕話：「剛剛唱那首歌，我想好了，在最好的年紀等到你，我想18歲是我最好的年紀，我們相處12年，我當了10年藝人，還有兩年懵懂的時期，謝謝你們。」
事後馮柯喺微博話自己個腦仲係一片空白，但呢啲大膽告白應該由佢去做，𠵱家要女友出面，覺得好慚愧，佢仲承諾話：「我會有一個特別的求婚儀式回饋給她。」
撰文：馮仁昭
