皇馬青訓營殺入香港！皇馬曾喺全球21個國家舉辦青訓計劃，今年夢想基金會獲西班牙皇家馬德里基金會授權，今個夏天喺香港舉辦全球首個皇馬籃球足球聯辦青訓計劃，孕育新一代港產球星。
夢想基金會創會會長莫景瀧話，好榮幸獲皇馬支持，將國際專業水平嘅訓練帶嚟香港，今個夏天係第一期計劃，受惠學員多達800人，亦有80個助理教練可以受訓，仲有教練會專程由西班牙赴港傳授球技。
訓練營8月3日開始，為期約3星期，只會喺西貢、將軍澳區內嘅團體同學校招募學員，為區內對籃球、足球有熱誠、有技術嘅青年提供世界級專業訓練，所有費用由夢想基金會贊助，訓練場地當然亦係選址區內。話時話，呢區好似得個單車館稱得上係「世界級」體育場地咋喎。