記起學游水時聽過，如果遇上有人遇溺，記得要從後面捉實遇溺者，慢慢游上岸。假如正面游向遇溺者，後者本能反應捉實不放，結果係兩個齊齊沉落水。 面對恐懼，的確令人失去冷靜同理智。
內地過去一個禮拜連環出招救市，但越救越跌，越跌越亂，有分析話即使阿爺托市，但想重回升市冇咁易。內地股市近九成由散戶主導，槓桿又大，大跌市之下令恐慌情緒一發不可收拾。
早前有報道提到，A股大跌跟外資惡意沽空有關，世銀7.1發表半年度中國經濟報告被極速鏟走。
睇番外媒報道，世銀被刪除嘅內容係促請中國改變扭曲金融市場，改革歪曲激勵機制同監管結構，整頓金融資源分配同籌集方式。報告又列出數據指，中央政府掌控95%銀行資產，超越印度同俄羅斯嘅國家控制比例，分別為74%同40%，令中國國企得不成比例嘅信貸份額。負責撰寫呢份報告嘅世銀高級經濟師Karlis Smits警告，內地股市上落似過山車，提防大幅調整有潛在危險，阻礙經濟增長，拖累國內消費活動減弱。呢份報告出爐後，冇耐已被北大人要求刪除，而內地亦由7.1起連環出招救市。與其話世銀呢份報告說三道四，不如當作善意提醒，籲北大人勿向資產泡沫煽風點火。
C+B
本欄逢周一刊出