落飛黨今日一直冇乜料到，到第六場四班草地千六米一嚟就兩件，一對綠燈馬「拼搏小子」同「高利多」拉士一內一外追上幾乎包Q，只可惜畀「友瑩養」做程咬金，搞垮咗由前兩駒組成之17倍啡燈Q。
落飛黨慶幸嘅係胡廐「拼搏小子」不負所托，臨尾打到9.5倍及時趕到，由薛寶力後上打開轉倉後勝門，幫埋胡森連贏兩期，家陣佢有12win，仲差三場至達標，而「拼搏小子」搭「友瑩養」Q有46倍。
今場最後100米至係高潮，六、七隻馬短兵相接，一檔起步之「拼搏小子」鬼咁牙煙，左穿右插好遲至搵到內欄一個罅位殺上，僅鼻位衝贏最早突圍之「友瑩養」勝出，季軍「高利多」其實最慘，若非直路嚴重內閃，令柏寶難於催策的話，「高利多」不會輸短馬頭位，幾乎肯定可以成為冠軍。
最特別是第四名鬥到難分難解，結果電眼都搞佢哋唔掂，開出三駒平頭第四，包括「綫路財星」、「大家熊」及「權杖神駒」，四連環同四重彩各有三瓣派彩。而今場頭七名只半身位內分勝負。