民主黨位於太子、實用面積約1,800呎嘅總部用咗25年，從來都冇大裝修過，職員成日呻地方又殘又舊又唔見使，白鴿黨前幾年努力籌錢，想換個大一倍嘅會址，奈何主席劉慧卿話呀，要買個4,000、5,000呎嘅地方實在太貴，最終決定斥資136萬裝修總部，同時用670萬喺荔枝角搵咗個千呎工廈單位做創意媒體部做工作室。
部做工作室。 學民搵平租新會址
白鴿黨噚日邀請八方到裝修過嘅總部參觀，入口大門擴闊咗，空間感大增，又加咗可透光窗戶，有助更多自然光引入辦公室。但八方最耳目一新，喺白綠色為主調嘅總部，門口新增咗接待處，由雨傘運動圖片製成嘅牆紙配上「為香港搏盡」嘅口號（圖），非常醒神。卿姐話多謝市民支持，今年籌款獎券都賣得幾好，笑指如果喺建制派政改投票甩轆後賣，分分鐘籌多幾10萬㖭。
另外，學民思潮位於荔枝角嘅總部則喺今年9月租約期滿，召集人黃之鋒喺fb話業主要求加租，有意尋找新會址，而學民需要1,600平方呎以上嘅廉租單位，理想地點係位於觀塘綫或荔枝角至尖沙嘴港鐵沿線，希望有好心人推薦單位，並助學生一臂之力解決租金問題。