靠住同基斯坦奴朗拿度（C朗）嘅緋聞上位嘅智利巨胸索模Daniella Chave（圖）又上鏡嘞，佢上周六入場撐智利，見證國家隊擊敗美斯嘅阿根廷，歷史性成為南美之王。Daniella呢次冇着低胸衫騷身材，而係着住智利波衫，搖住支智利旗，為國家隊打氣。Daniella係《花花公子》嘅模特兒，上個月大爆自己做過C朗嘅小三，喺C朗同艾琳娜拍緊拖嗰陣已經同佢搞埋一齊，佢仲話C朗好鍾意佢個胸㖭。
花絮︰美斯阿哥慘被掟
喺決賽，美斯嘅屋企人都有去到球場睇波，但主場嘅智利球迷就對美斯屋企人唔客氣，除咗俾人狂鬧之外，美斯嘅哥哥仲俾人用雜物掟中，之後全家人喺保安護送下到包廂。據報，阿古路嘅屋企人喺睇波嘅時候都俾智利球迷騷擾。另外，阿根廷輸波，美斯賽後一臉失望，但有個智利球僮（右）好唔識趣，走去搵美斯影相。美斯就算好唔開心，都冇拒絕小球僮，相當有風度。
花絮︰網民改到射上月球
美洲盃決賽踢完，美斯同希古恩兩位阿根廷球星就成為網民惡搞嘅對象。美斯成屆賽事入得一球12碼，淘汰賽仍然冇波入，有漫畫畫美斯着住巴塞波衫就係神射手，百發百中，但着住阿根廷波衫就射極都唔中。至於完場前錯失良機兼且12碼「飛機」嘅希古恩亦被網民狂寸，話佢射咗個波上月球（圖），亦有網民幫希古恩諗設計對白，希古恩同美斯講：「有我喺度一日，你唔使旨意贏任何錦標！」
識睇，一定係睇足英台【英波Live】：
http://soccer.appledaily.com
http://bit.ly/engballlive