自由黨榮譽主席田北俊因為為民發聲，要求689特首考慮辭職而被阿爺搣柴，但佢冇因此嚇怕收聲，人氣越嚟越急升，成為人民武士，連佢隻馬都打正旗號叫「人民武士」，而且聽教聽話，喺香港動盪時勢，噚日再次贏馬，仲係大熱取勝，同田少一樣咁得民心。
侯志強「入地獄」前拉頭馬
「人民武士」身價不菲，周歲價達100萬澳元（超過600萬港元），來港跑三場贏兩場，證明貴得有道理，夾埋已贏咗近100萬港元獎金。「人民武士」上次喺今個馬季第689場「開齋」後，噚日喺沙田馬場再贏一場，賽後田少仲叫埋黨友、上水鄉事委員會主席侯志強等人齊齊拉頭馬。侯志強早前講過積極考慮參加新界東補選，仲話佢不入地獄，誰入地獄？噚日佢就入地獄前先入沙田馬場玩番日，仲有頭馬拉，不知幾過癮！田少話賽前練馬師大摩同佢講，叫佢記得入場，好大機會再拉頭馬，所以今次唔同上次只係請幾位馬迷一齊拉頭馬，而係一早call齊好友，怪唔得影頭馬相時好墟冚。