英格蘭女足喺今屆女子世盃四強慘輸俾日本女足1:2後，前晚終於威番次。佢哋喺季軍戰鬥德國女足，法定時間踢成0:0，去到加時18分鐘憑威廉姆絲射入12碼而小勝1:0，31年嚟首次贏德女兼攞到喺女子世盃嘅最佳成績。英女呢個季軍，亦係繼英格蘭男足喺1966年捧走世盃後，三獅兵團歷來喺世盃（包括男女）嘅第二佳成績。英女贏德女攞到女子世盃季軍後，每個球員額外有2,000鎊（約24,144港元），總數去到14,000鎊獎金，但當知道英足總喺舊年巴西世盃開畀男子隊嘅冠軍獎金係每人35萬鎊時，英女得呢個數真係少得可憐。雖然同工不同酬，不過英女領隊森遜希望外界可以認真看待佢哋今次嘅成就：「喺我心目中，班球員經已係傳奇。」英國傳媒都好識做，大做英女攞世盃季軍，其中《星期日泰晤士報》仲做埋體育版頭版㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive