昨日講及在美國讀完大學，如果想到著名顧問公司、投資銀行、著名媒體工作，喺邊間大學畢業，十分重要，西北大學副教授本新書只不過係將一啲社會現實「學術化」咗，講番俾普通讀者聽啫。如果唔係來自名牌大學，靠乜嘢打入華爾街呀？答案好簡單，靠人事，例如有校友在公司內成為高層，有姨丈姑丈世叔伯在內，或者阿媽係大老闆嘅傭人。紐約時報在六月三十日報導，Facebook有一位「環球多元化主管」（Global Head of Diversity）Maxine Williams宣稱FB清楚知道公司在員工多元化方面還未達標，有好大改善空間。聽起嚟好悅耳，但記者發現，去年威廉士女士係咁講，Google在2014年亦係咁講，講來講去，FB之拉丁裔僱員佔員工總數4%，非洲裔佔2%，2013年1200名員工之中，只有七個黑人，而白人超過55%，亞洲裔超過36%。
FB未必係歧視其他族裔，可能亦有心增聘黑人，但按Riveria教授嘅講法，大公司招聘人員係早已心中有數，非名校畢業生不聘請嘅話，又假設黑人在名校佔少數嘅話，黑人加入大公司嘅機會就十分微薄。
難怪亞洲人、猶太人家庭非常注重教育，盛產老虎媽媽，係要為仔女惡補考入哈耶牛劍，日本學生拼命要入東大早慶，中國學生誓要入北大清華復旦，入到呢啲大學，脫貧機會已經超過百分之五十，甚或更高。
香港情況又如何？坦白講，咪又係一樣，大銀行請MT，好多時係睇申請人來自甚麼國際名校，投資銀行係在本地大學招聘，只限於港大中大科大，但呢三大學生與海歸學生比拼，無取勝把握，本港著名學校招聘老師，亦係只睇三大，故此如果大學聲譽低落，排名不斷下滑嘅話，廣義上會打擊該校學生搵好工脫貧嘅機會。記得1970年代初，中大嶺南商學院有MBA課程，尚未廣為人知，畢業生要加入外資大跨國公司，頗有難度，好彩有一位美國老師John Espy博士好明白呢個道理，一個星期有幾日由沙田走到中環，拍門見美資銀行，美資跨國公司高層，推銷中大MBA，點解啲高層肯見佢？Espy係哈佛DBA噃，教授陣容內又有一位哈佛商管博士馮國經，外資點都要俾個機會Espy啦，如是者經過幾年努力，中大MBA畢業生紛紛加入美資大行，當年好多畢業生十分感謝Espy，今天仍然懷念佢！