【澳門直擊】張智霖（Chilam）前晚於澳門舉行「張智霖瘋狂有時演唱會澳門站」，白馬王子look出場的Chilam唱了一首歌嗌熱，除褸晒壯闊手臂令觀眾起哄，之後發現耳機線甩掉，他再灑鹽花：「我要搵番條嘢出嚟先。」到工作人員上台，他再說：「你要伸手插入去，不過我件衫畀你扯到好緊，係咪要除衫呢？」觀眾又再瘋狂尖叫。
前晚袁詠儀在北京拍戲沒有現身，Chilam在台上取笑她迷戀韓星李敏鎬，他說：「得唔到嘅愛情係最朝思夢想，就好似袁詠儀見到李敏鎬咁，感覺就同我以下呢首歌嘅歌名一樣。」隨後就演唱《死去活來》。
嘆表現未到最好
鄭欣宜是Chilam演唱會唯一嘉賓，欣宜將Chilam的帽掟落台幫他揀觀眾上台玩遊戲，女粉絲上台即拖實他，Chilam即笑說：「時下啲女仔都好主動喎！」演唱會另一高潮是Chilam以「Cool魔」機師Look出場，還有多位性感舞蹈員的手不斷在他身上遊走，並替他解褲頭鈕。
Chilam完騷後直指表現未到最好，他唱《少一天都太短》 及《義氣仔女》都落淚，尤其唱《少一天都太短》更喊至完全甩嘴要重唱，Chilam表示：「今日好多人睇到尾，所以觸動到，冇枉費我個幾月嘅綵排。」
採訪、攝影：馬建華