建制派「等埋發叔」甩轆風波對花生友嚟講，真係歷久常新，幾時都可以炒番，尤其事件牽涉民建聯譚耀宗、葉國謙同經民聯林健鋒等政界老手喎，笑位更加多，難怪美國駐港總領事夏千福都忍唔住寸爆，話今次離場甩轆事件，反映香港嘅政治仲係有啲raw、即係可解作未成熟。唔通千福BB想笑佢哋政治上好幼稚？
袁國強同場
建制派甩轆事件成為政界笑柄，八方聽聞千福BB喺上月30日舉行嘅一個紀念美國獨立日酒會，致辭時首次公開評論政改表決風波，話立法會未表決政改前，港人就政改方案嘅意見壁壘分明，但立法會隨之而嚟嘅投票結果，就令佢覺香港政治有啲Raw，「politics in Hong Kong are, frankly, a little raw」千福BB點到即止，未有深入解讀。八方查過字典㗎，raw可以解作不成熟、無經驗，而raw politics呢，就可以解赤裸裸嘅政治，意思即係指互相權鬥，無論點解，都好似好中喎。據知政改三人組成員之一嘅律政司司長袁國強都有出席，唔知聽到千福BB呢番金石良言，係咪感觸良多？
李八方
mailto:[email protected]