財政司司長曾俊華上星期好巴閉，訪京期間獲國家主席習近平金手一握，旋即被視為下屆特首黑馬，噚日鬍鬚曾喺網誌講訪京行，偏偏冇提呢個歷史性時刻，可能覺得要低調啲。而似乎習一握之外，鬍鬚曾仲有其他收穫。
佢話上周訪京期間，仲拜訪咗亞投行籌備處秘書長金立群同絲路基金董事長金琦等，其間佢向金秘書長表達，希望亞投行可以喺香港設立辦事處，引述金秘書長對建議有正面回應，雙方仲喺會後即時跟進。既然獲習總眾裏尋他，其他人又點會唔畀面？而全國人大常委范徐麗泰噚日回應傳媒就話，鬍鬚曾獲習近平握手冇乜特別啫，覺得大家無謂將事件放到咁大，仲話「只要能夠選到，任何一個人做（特首）都好」，只要唔係自以為是嘅人去做就得嘞。