近日市場焦點都被中國股市同希臘債務危機吸引住，其實環球多個市場都出現異動，由7月開始往後幾個月相信都會波譎雲詭。先簡述市場最關心嘅中國股市及希臘問題。
中國股市：滬綜指由5178點殺落嚟已經三成，就算係熊市都好大機會準備反彈，係牛定熊就觀察反彈後形態。昨日中國證券協會聯合公告，21家證券行夾1,200億元入市買藍籌ETF。但穩陣起見，最好離場等佢插夠先，或只用之前贏嘅錢小注玩吓。
希臘債務危機：希臘公投在即，IMF上周四突然出份報告《Greece: Preliminary Draft Debt Sustainability Analysis》搞搞震。大意係縱然傾得成，希臘債務都不可持續，另外IMF建議要畀希臘20年還債寬限期，變相鼓勵希臘公投否決現時嘅還債方案。希臘問題其實係小菜一碟，真正問題為下半年葡萄牙、西班牙大選，如果希臘賴債成功，其他國家可能有樣學樣，對歐盟係嚴重打擊，歐元將會弱勢。
伊朗談判：市場被希臘搶去焦點，其實伊朗問題影響更大。伊朗同美國談判是否公開部份核設施畀聯合國定期巡查，換取西方國家減少對伊朗經濟制裁。WTI原油現時60蚊附近已橫行好幾個月，係準備爆邊狀態。伊朗談判若成，初期相信會恢復每日100萬桶原油供應，對比沙特每日1,000萬桶屬小數，但喺現時供過於求情況下，美國頁岩油亦準備出口，容易再引發割價戰爭市場份額。
大宗商品：近一個月唔少大宗商品急升，尤其農產品，粟米、小麥等已升一至兩成，市場都炒今年係咪有厄爾尼諾現象。農產品只係剛剛起步，未升完，農產品急升後會影響飼料價格，再而令肉類都跟升。農產品價向上，油價爆上定爆落則未知，若糧上油落會抵銷通脹，糧油齊上則加大美國加息壓力。
美國債孳息：美國三十年國債孳息唔覺唔覺已升至3.2%，十年國債孳息亦升至2.4%，而且長債息升得比短債息多，其實就係耶倫上場前所講，要將美國債孳息曲線拗番上。聯儲局今年應加息一至兩次，兩次的話，結合債息走勢，相信係9月及12月。
Mr. Tregunter