港府5月突然提出，將今年9月3日定為一次過嘅特別公眾假期，紀念抗日戰爭勝利70周年；但好似啲網民話齋，對一班高官同建制派嚟講，抗日還抗日，日本仔嘅好係另作別論嘅。好似特首梁振英去SOGO買sushi氹女、民建聯鍾樹根去京都賞櫻，就連政制及內地事務局副局長劉江華呢幾日都畀《蘋果》讀者影到，佢去東京shopping買靚衫。
雖然劉鑾雄大仔劉鳴煒都勸年輕人去少啲日本，但八方都好明白，而家啲yen紙咁平，嗰度價廉物美，試問誰能抗拒？眼利嘅《蘋果》讀者陳先生喺東京嘅「伊勢丹」（Isetan）百貨公司分店，就發現劉江華都嚟買衫。睇番資料，原來伊勢丹係賣和服起家，而家擅長賣流行服裝，仲開拓男士服裝市場，亦吸引到劉江華青睞。
政改方案雖然「甩轆」得8票支持，但卸下頭號任務嘅劉江華似乎心情唔錯，身穿綠色jacket嚟掃貨，非常sharp醒。讀者仲影到劉江華望著件衫「雙手合十」，莫非佢一陣準備去神社？