男拔創歷史！拔萃男書院噚日喺灣仔港灣道體育館上演嘅全港學界籃球馬拉松決賽，憑效力甲一晉龍嘅中六生安家仲攻入全場最高嘅17分，領軍以35:22擊敗中華基督教會桂華山中學，成為學界男籃史上，首支包辦九龍區D1、精英賽、籃球邀請賽同馬拉松嘅四冠王！
男拔噚日喺馬拉松先後擊敗滬江維多利亞、漢華同衞冕嘅英華殺入決賽，硬撼精英賽決賽手下敗將桂華山。雖然桂華山喺開賽初段多次搶得進攻籃板同入楔得分，但半場依然要落後畀有安家仲着晒火嘅男拔16:19。易邊後，男拔喺全場逾百支持者打氣下，把握對手連番失誤，逐漸拉開比分，終以13分之差大炒對手，歷史性橫掃今屆學界所有錦標，全隊賽後更興奮得拋起教練胡國鋒慶祝！
賽後榮膺MVP嘅「安仔」安家仲，更一度激動到灑下男兒淚：「因為今（噚）日比賽表現唔算太好，但最終殺入決賽，大家之前未試過成功衝擊決賽，所以決心比較大；而喺決賽度，隊友葉偉恆喺內線被夾擊，變相令我哋啲外線球員有較多空位得分。好開心可以協助球隊完成四冠歷史，並以MVP結束自己嘅學界生涯。全隊將會拎嗰2,500蚊冠軍獎金嚟食飯慶功。」
協恩小勝橫掃女子組
至於女子組方面，協恩中學就以25:20小勝寶覺中學，同男拔睇齊成為「四冠后」。就讀中六嘅協恩射手謝亦霖，賽後亦榮膺學界生涯首個MVP，佢話：「好開心可以為自己學界生涯寫下完美句號，希望DSE放榜可以拎到好成績，晉升心儀嘅大學同學系。」