亞洲電視早前不獲政府續發免費電視牌照，只能廣播至明年4月1日為止。但最近盛傳山東青島中金集團董事長司榮彬注資做大股東，身份未正式公佈，但已有好多新動作。繼有消息指會轉新台徽後，前晚亞視facebook專頁貼上一條大規模招聘廣告短片，有廣東話及普通話兩個版本，一開始用剪影加大字說：「全新亞視！全球招募主持人、編導！讓我哋一切重新開始！」亞視執董葉家寶在網誌透露未來會以亞洲電視、亞視衞星電視和亞視OTT平台的「三亞」發展，但網民卻質疑：「請人有冇糧出？」、「係唔係請義工？」
亞視前高層盛品儒昨日在深水埗活動上，透露亞視大股東黃炳均已收幾千萬定金，他說：「聽講已交易成功。」是否山東財團？他說：「都係傳開嗰一個，佢哋未公佈我唔講。」未來是否招聘內地人？他說：「佢哋有自己方向，睇報道話重新出發，相信市場唔係只集中香港，可能作全亞洲。」
於王征時代被炒魷的戚黛黛昨日在電話說：「咁得意呀？」黛黛表示不介意回巢，可擔心冇糧出？她說：「擔心㗎，所以要清楚條款先，其實我之前喺亞視做好開心，惟獨管理層麻麻哋啫，我唔會自薦，但佢哋搵我都唔介意傾。」
劉錫賢未傾約
劉錫賢和朱慧珊相繼於下月及9月約滿，但至今仍未獲洽談新約，朱慧珊表示不擔心：「咪當放暑期囉！有招聘係好事，之前走咗好多人，如果可以梗係想開番《12點半新聞》，製作部亦停頓咗一段時間，希望可以同步做到。」劉錫賢則說：「渴望老闆大展拳腳，唔想大搞就唔會全球招募啦。雖然牌照至明年4月，但之前家寶都話會改另一形式做落去，總之要畀下面員工有飯開至得。」
採訪：嵐山、王連連
攝影：仇志德
