上個月對自由黨榮譽主席田北俊嚟講，可以話係奇幻月份，先係佢隻身價超過600萬港元嘅新馬「人民武士」贏得今季第689場賽事，隱含人民勝689呢個玄機；繼而日前政改表決，田少冇跟建制派大隊離場，相反緊守崗位投票，贏得不少掌聲。
大家咪睇田少出身富貴，其實佢好親民。話說「人民武士」當日贏馬後，田少同幾個陌生面孔一起拉頭馬。老實講嗰幾個人，都冇田少嗰種氣質，唔似一貫行埋田少身邊嘅朋友，當時其他馬主已經有疑問，究竟佢哋乜水呀？後尾田少自爆原來根本唔識佢哋，不過賽前一齊喺觀眾席嗌馬，贏咗就邀佢哋拉頭馬，田少仲話人民武士梗係與人民同樂。由此可見佢心胸真係幾廣闊，唔似得689方丈份人……
講番「人民武士」，將於周日（5日）再戰，當然唔再係第689場賽事，而係第747場，隻馬之前初出輸好遠，上仗才第二戰狀態初起即勝，可見質素高貴得有道理。此駒同父同母兄長贏1600米，所以「人民武士」今次增程跑1400米絕無問題，如果順利勝出，唔知田少會否又任由陌生人拉頭馬呢？