昨日提及之美國雜誌「The Atlantic」一篇訪問，記者Bourree Lam（林布蕾），受訪人Lauren Rivera，係西北大學Kellogg管理學院副教授，西北大學位於離開芝加哥不遠，林布蕾係芝加哥大學畢業生，現時職位係「大西洋」嘅副編輯。
呢篇訪問稿指出，在美國要成為1%，每年家庭收入最少要有33萬2千美元，如果唔係富豪後代，就要在大學畢業後搵到份好工，一路升職，踏上青雲路。何謂好工（elite jobs）？普遍係指在投資銀行做分析員（投行新丁嘅第一個職銜），在麥肯錫做初級顧問，在華爾街律師行做新紮律師，在財富500大公司做行政見習生等等。
點樣先至得到招聘人員垂青，搵到份好工，希望從此脫貧，在社會階梯一路向上爬呢？
R教授就一盆冷水照頭淋，舉出殘酷現實，令到一啲「非精英家庭」成員幾沮喪。R教授嘅研究發現，上述大公司、律師行、顧問公司、投資銀行嘅HR（人力資源）部平時收到數以千計嘅CV，因人手所限，無可能逐份睇，逐份仔細研究，平時已經「心中有數」或實際上列出一份名單，內分Cores（核心名校）與Targets（目標名校）兩大類，前者係美國排名頂尖嘅大學（哈佛耶魯普林斯頓史丹福之類），後者係排名高，聲譽不俗，且有啲學科特別出色之類，HR收到學生申請表及CV之後，若非來自「核心」或「目標」名校，申請信幾乎肯定被丟落一個大桶，無人再理會。另外最大公司嘅HR招聘人員會分成「哈佛隊」、「普林斯頓隊」，專門研讀呢啲名校嘅學生CV，請佢地嚟面試，面試時會談及一啲（學生嘅）課外活動，人生經歷，實習經驗等等，假如一位哈佛生來自基層，靠獎學金讀書，無餘錢及時間去非洲做義工、攀登喜瑪拉雅山、去過倫敦巴黎參觀博物館之類，實會吃虧。R教授指目前美國嘅精英公司招聘精英學生嘅方法與過程，全部不利普通學校學生及精英學校之窮家學生，根本係從源頭開始就製造income inequality，一啲頂尖大學收生要睇課外活動經歷，亦係歧視基層學生嘅行為，但整個美國制度就係咁，根本難以改革。左丁山所關心嘅，就係恐怕香港也會變成如此，哈耶牛劍學生回港攞晒啲好工，令本地精英學生不能爬上去，另一方面，本地大學若不能在聲譽上有所提高，在現實社會係會傷及學生搵工前途嘅！