當馬匹表現欠佳，拉倉一試無可厚非，全港最大馬主蕭百君家族，佢隻「大威力」來港前響法國薄有名氣，既係1800米三級賽盟主，亦係2000米二級賽尤金亞當錦標季軍，肯定係貴價貨，來港後由賀賢訓練12仗全落第，難免有啲失望，早前唯有轉投告東尼馬房，好明顯蕭百君一心藉住換吓環境，為愛駒能力尋求答案。奇怪嘅係佢與仔女有幾位合作嘅開練馬師如大摩、方嘉柏等，「大威力」卻拉去之前未嘗有交收嘅告東尼，就如當初「澳斯卡」加盟蔡約翰，一樣出人意表。
其實早兩三個月前，「大威力」未拉倉時，蕭百君已講過同告東尼早就相識，亦好欣賞，總會有機會合作，言猶在耳，「大威力」周日(5日)將轉廄初出爭泥地1650米，睇番隻馬加盟東廐後，狀態的確提升好快，上月試兩課大閘力谷狀態，其中6月26日泥地1200米閘，留前試後反應甚佳，以強橫走勢勝出，已經試到準晒。
唔講唔知，告東尼今季得45場頭馬，成績比對上6季都要差，以頭馬數字計絕對陷入低潮，難得有大馬主加盟，可以預期告東尼一定出盡法寶，力求「大威力」轉倉即勝，以博取蕭百君將來有更大支持。