D佐敦過小馬唔去紐約人，拓荒者中鋒R盧比斯（Robin Lopez）就成功「執二攤」，以5,400萬美元（約4.19億港元）同紐約人簽約四年。拓荒者兩位射手W馬菲斯同巴登（Nicolas Batum）都已經先後離隊，𠵱家R盧比斯都走埋，而阿域治（LaMarcus Aldridge）亦好大機會去馬刺，球隊上季五個正選分分鐘走足四個。
睇情形，拓荒者應該會以13年新人王尼拉特（Damian Lillard）同布林利（Mason Plumlee）做重建核心，加埋幾個有潛質嘅後生仔組青春班。不過，唔計未決定去留嘅自由身同今季兩位選秀新人，拓荒者來季嘅球員名單得番九個人，班管理層真係要諗諗點搞先執得掂個陣；尤其是球隊連續兩季打入季後賽，上季仲歷史性成為西北分區冠軍，未來幾年恐怕唔會再有呢支歌仔唱，拓荒者球迷要做定心理準備嘞。