近排NBA唔少自由身球員都陸續公佈去向，作為今夏最矚目嘅自由身中鋒，D佐敦（DeAndre Jordan）都有着落，美國《ESPN》等主流媒體上周五公佈佢會過檔小馬，獲一張四年8,000萬美元（約6.2億港元）合約，連埋喺拓荒者簽入射手W馬菲斯（Wesley Matthews），加埋原有嘅奴域斯基（Dirk Nowitzki）同柏臣斯（Chandler Parsons），小馬個五星陣仲爭控衞林書豪（J.Lin）咋。
柏臣斯連環做說客
嗱，唔係個個NBA球員都向錢看㗎，D佐敦就拒絕咗快艇五年1.09億美元（約8.45億港元）嘅合約，寧願收少啲都去小馬，表面原因就係「愛回家」──D佐敦出身於德州農工大學，今次可以重返德州。不過，據報背後原因係佢不滿喺快艇嘅地位，就算上季係內線雙塔之一，但風頭始終及唔上比歷克格芬（Blake Griffin）；而且罰球命中率低嘅佢成日俾對手hack，抱怨隊友唔支持，反而俾教練李華士（Doc Rivers）批評，又同基斯保羅（Chris Paul）傳不和，搞到意興闌珊離開洛杉磯。
相反，小馬搵佢就夠晒誠意，除咗班主古賓同柏臣斯做說客，親自去洛杉磯搵佢傾偈，連奴域斯基都提早結束假期去搵佢，令佢非常感動。無可否認，以D佐敦26歲仔嘅活力，肯定比小馬原本中鋒真達拿（Tyson Chandler）好；但佢上季常規賽高達71%嘅命中率，好多時都係得到基斯保羅同格芬妙傳大力入樽，小馬冇乜呢啲傳球好手，D佐敦要搵食真係難好多。
帝王短約「收留」朗度
小馬同日簽埋拓荒者三分射手W馬菲斯，不過佢左腳阿基里斯腱有傷，要10月先可以復操。淨番正選控衞呢個位，似乎都係留畀林書豪嘞；J.Lin𠵱家仲喺台灣出席緊探訪活動，日前仲同歌手林俊傑唱K㖭。要簽J.Lin，小馬可能又要靠柏臣斯出手，事關兩個打火箭時私交甚篤，小馬風格亦都幾啱佢嘅。講開控衞，小馬原本有朗度（Rajon Rondo）在陣，點知佢季後賽期間「玩火」，搞到教練卡利奧（Rick Carlisle）講明永不錄用。𠵱家朗度都有着落，就係去帝王，但只係得一年950萬美元短約，睇嚟成個聯盟都驚佢又「自爆」，早知今日又何必當初呢？
