周四係NBA自由轉會窗重開嘅第二日，雖然交投好似冇第一日咁活躍，但係都有一單重大新聞：馬刺嘅39歲傳奇大前鋒鄧肯（Tim Duncan）宣佈打多一季（見附表），將會第19季披上銀黑戰衣。對於一直封鄧肯做偶像嘅拓荒者大前鋒阿域治（LaMarcus Aldridge）嚟講，加盟馬刺嘅理由又多一個嘞。
阿域治當鄧肯偶像
「我已經同Pop（教練普波域治）傾過，我下年仲會落場。」鄧肯輕描淡寫講一句，就向大家宣佈咗至少會打多一季先退休。馬刺迷除咗終於可以放下心頭大石，確定會睇到「石佛」嘅第19季之外，仲有另一個值得興奮嘅原因。一般分析認為，鄧肯選擇喺呢個時間宣佈喜訊，目的就係為球隊爭贏自由身市場嘅搶手貨阿域治增加籌碼。
可以打大前鋒同中鋒位嘅阿域治曾經多次公開講過，佢偶像就係同樣全能嘅鄧肯。包括鄧肯在內嘅馬刺代表，周三同阿域治傾完偈，第二日鄧肯就話會留效；咁好嘅機會同偶像做隊友，阿域治梗識揀嘅。與此同時，馬刺呢幾日先後同前季總決賽MVP尼納特（Kawhi Leonard）同三分王丹尼爾格連（Danny Green）兩位主將傾掂數續約，保留強勁班底之餘，亦送走咗中鋒史巴利達（Tiago Splitter）同大前鋒貝尼斯（Aron Baynes），密密清出薪酬空間，準備開出一張頂薪合約畀阿域治。
湖人未死心 熱火入戰團
雖然盛傳阿域治暫時對馬刺同太陽嘅印象較好，但精明嘅佢當然唔會草率做決定。好似首次面談印象麻麻嘅湖人，阿域治都肯畀第二次機會佢哋，周四晏晝就同總經理古卓克（Mitch Kupchak）同教練史葛（Byron Scott）會面；但係到夜晚，佢就去咗同熱火總經理萊利（Pat Riley）食飯，莫非連熱火都有意加入戰團？
講到隊隊都有機會贏到阿域治歡心咁，但其實佢又唔係肯定會離開效力咗九季嘅母會拓荒者嘅。啱啱同拓荒者以1.25億美元續約五年嘅新紮控衞尼拉特（Damian Lillard），就急急安排飛一轉洛杉磯，希望可以親身同阿域治見面，幫口留住呢位好拍檔。
退役
37歲嘅K馬田（Kenyon Martin、左）喺周四宣佈退役。呢位外號「狂人」嘅前網隊大前鋒，喺03年曾率領網隊殺入總決賽，不過就輸咗畀由鄧肯坐鎮嘅馬刺，估唔到呢位00年狀元仲早過97年參加選秀嘅鄧肯退休。資料圖片
